المغتربون حضارات سادت ثم بادت ( منقووووووووووول)

تحية طيبة لكم

في البداية أحب أن اثبت الحقوق الملكية في المقال للكاتب / عبدالحي ابوسبيب حتى لا أظلمه حقه واتغول على جهده الفكري .... الموضوع وجدتو وعجبني ونقلتو ليكم كما هو ك


[b]

لا اود الحديث في موضوع الاغتراب بأسهاب وبتفصيل دقيق ممل لان خير الكلام ما قل ودل ... ولان الموضوع اصلاً موضوع مستهلك في كثير من المنتديات مثله مثل مواضيع كثيره مستهلكه وممضوغه مضغ الغنمايه الجيعانه للملايه بس بنطرحو هنا عشان نشوف رأى ناس رفاعه شنو خاصه بعد قريت دليل الاعضاء و لقيت انو مجموعه كبيره جدا من الاعضاء اذ ما كانت الغالبيه هم خارج السودان .


حبيت فقط اوضح بعض المفاهيم للاخوه المغتربين :-


اولاً الاغتراب ده وهم كبير يعني الزول بكون عايش في حلم .. واصلاً ح يصحى منو .. لانك لابد يوم ترجع بلدك ان طال الزمن او قصر .. ولو بي يدك او بالقوه والخروج النهائي البدون عوده .. غير مأسوفاً عليك ... وكلنا نعلم ان كل دول الخليج اتجهت نحو ان لا توظف الغرباء الا في المهن الهامشيه فقط .. وفي السعوديه بالذات يطلقون على ذلك سعودة الوظائف .. وفي نهاية الامر لا يصح الا الصحيح



* ثانياً هناك اعتقاد لدي كثير من الناس ان السودان خيرو الا (( للكيزان بس )) وده اعتقاد خاطئ لانو الكلام ده غير صحيح بنسبة 100% بل به بعض الصحه .. وكم من غير الكيزان يتمتعون بفرص العمل والاستثمار وخصوصاً في الفتره الاخيره

* ثالثاً السودان الان في مرحلة انطلاق وانفتاح والنهضه العمرانيه والاقتصاديه في البلد ظاهره للعيان الا من ابى ... ولا ننكر ان البلاد في انطلاقها نحو الازدهار تستصحب معها بعض السلبيات والانتكاسات (( بسبب التدخل الامريكي )) الذي لا يريد لهذا المارد ان ينطلق نحو العافيه والنمو والازدهار لامكانياته الضخمه الغير محدوده والتي يريد المتأمرون من دول غربيه واتباعهم ان يستأثروا بها فعودوا بني وطني لننهض بهذا الوطن معاً



*رابعاً المغتربون يعيشون في عز وهمي ويعتقدون انهم الطبقه العليا في البلد (والكلام ده كان زمان ) حسي علي الطلاق الفنانات بقن ما بغنن ليكم والغنى بقى كلو لي ناس البلد ياخ الالف ريال بقى بي 500 الف يعني البياخد 5000 الف ريال (( ودي ما بياخدا الا زول قديم في الاغتراب وبيطيع الكفيل طاعه عمياء )) بياخد اتنين مليون ونص بالسوداني .. ودي عند اصغر مهندس شغال في اصغر شركة بترول في البلد دي بياخدا (( وامانه ما شركان البترول ما كترت في البلد (( هجليج وقريتر نايل وبتروناس ورام وشلمبرقير وشركة النيل الكبرى و... و... ده غير شركات الطرق والجسور والمنظمات الشغاله في البلد دي يعني البلد بي خيرا بس تعالوا

*خامساً يعتقد المغتربين انهم مرتاحين نفسياً ما زي الناس الجوه السودان وده غلط كبير ... فكيف ترتاح نفسياً وانت بعيد عن زوجتك(غالبا) وامك وابوك واخوك وصديقك .. كيف ترتاح نفسياً وانت تعمل في بناء وطن غير وطنك .. كيف ترتاح نفسياً وانت في بلد ينظر اليك اهله بأنك جئتهم لتضايقهم في رزقهم .. كيف ترتاح نفسياً وانت ينظر لك الكفيل بعين الازدراء والاستحقار


سادساً نحن لا نقصد غير ان ترجعوا لدياركم التي ترحب بكم دائماً وتعملوا على بناء اوطانكم وتستمتعوا بالدفء الاسري الذي حرمتم منه كثيراً .. وكفاكم مكابره ... وعلي الحلف... قعدة جبنه في ضُل راكوبه او كشاشه مع حبوباتكم اخير ليكم من بوفي مفتوح في برج العرب

وبلداً ما بلدك ارنبو تاكل ولدك


وبلدي وان جارت علي عزيزة ** واهلي وان ضنوا علي كرام

لك التحيه الاخ الفاضل تاتاي
والتحيه ايضا لصاحب الموضوع
اختلف معه جملا وتفصيلا في كثير من النقاط التي ذكرها
اولا صعوبه التوظيف لغير المواليين للحكومه((الكيـــــــــــــزان))ويمكن لغير الكيزان ان يتوظفو ولكن هنالك صعوبه في ذلك الا لمن له (واســــــــــــــــــــــــطه)

ثانيا: السودان للان مصيره مامعروف والواقع يقول ان هنالك مشاكل كبيره في طريقها لانفجار والوضع الاقتصادي سيتدهور اكثر مما هو عليه الان
ثالثا: الجنيه السوداني يشهد انخفاضا كبيرا مقارنه مع العملات الاخري((الدولار-الريال السعودي-الدرهم الاماراتي ....الخ) وحتي لو لقيت واسطه واتعينت حااصرف كم يعني افترض مليون هل ستكفي لمجابهه الاحتياجات؟ لا ولن تكفي

رابعا: من الافضل الا اكون مرتاح نفسيا بسبب البعد عن العائله وذلك لاوفرلهم سبل العيش الكريم فهذا افضل من التواجد معهم واكون لااملك شئ .

تحية طيبة لك أخي الكريم صالح

معليش امكن في حاجة انا ما انتبهت ليها ان الموضوع لامن رجعت للمصدر لقيت تاريخو يعود لحوالي سنتين او اكثر وده فيهو تفسير لحتة سعر الريال اذا ماقارناه اليوم فعلا فهو قارب
الثمانمائة جنية بالقديم مقابل الريال السعودي

غايتو بالنسبة للوظائف أنا شخصيا بعول دائما على المشيئة الربانية والقسمة والنصيب الولاؤ والواسطة والحاجات دي كلها بتجي عندي في الصفوف الخلفية ... لأنو ده تبع الارزاق( ولوكانت الارزاق على الحِجى لمتن من جهلهن البهائم ) فالواسطات والولاءات الحزبية يمكن ان تكون نوع من الحجى طبعا عشان كده ربنا سبحانه وتعالى قال ( وكل شيء عنده بمقدار ).. يبقى الارزاق مرتبة ترتيب رباني دقيق
نعم اتفق معك تماما ان السودان الان الصورة ضبابية شديد جدا ونسأل الله الستر مماهو في رحم الغيب ونسأله سبحانه وتعالى ان يقدر لنا الخير ويتلطف بعباده

تسلم ياحبيب على الاثراء الرائع